Feb 28, 2023
Сальвадорда қотил ва бандитлар учун алоҳида махсус қамоқхона очилди. Жудаям каттакон мегатурмахонага илк икки мингта маҳбус келтирилди. Мазкур жазо муассасаси мамлакат президенти Найиб Букеленинг жиноий оламга қарши очган уруши эпицентри ҳисобланмоқда.
Ўтган йилнинг март ойидан мамлакатда фавқулодда ҳолат тизими ўрнатилган, бу ҳукуматнинг жиноий гуруҳларнинг ўта кўп сонда содир этган зўравонликлар ва қотилликларига жавобидир. Ўн минглаб киши полиция томонидан олиб борилган махсус амалиётлари пайтида гангстерлар гуруҳига алоқадорликда гумонланиб қўлга олинган.
Янги мега турмахона 40 минг ўринга мўлжалланган. Бу қамоқхона мамлакат пойтахтидан 72 км узоқ масофада ташқи муҳитдан иҳоталанган Теколука ҳудудида бунёд этилган. Мазкур муассаса Лотин Америкасида шу йўсиндаги ўта йирик иншоот ҳисобланиб, у маҳкумлар қочиб кетишига йўл қўйилмайдиган янгича технология билан жиҳозланган.
Қамоқхона 8 бинодан иборат. Унинг ҳар бирида 100 квадрат метрли 32 та камера мавжуд, унда юзлаб маҳбус сақланади. Ҳар бир камерада иккита раковина ва иккита ҳожатхона бор.
Сальвадор президенти томонидан кўрилган фавқулодда чоралар кўпчиликда қарама қарши фикрларни уйғотган, зотан уларга кўра бу фуқароларнинг айрим конституцион ҳуқуқларини чеклайди. Жумладан, полиция кучларига шубҳа остидаги кишиларни ордерсиз ҳибс этишга рухсат берилган.
Гангстерларга қарши уруш жараёнида Сальвадор полицияси 64 минг кишини ушлади. Бироқ инсон ҳуқуқи фаолларининг билдиришича, бу ҳўл қуруқ аралаш рўй бериб, бундан бегуноҳ кишилар ноҳақ жабрланган. Аммо президентнинг бандитларга қарши сиёсати маҳаллий аҳоли орасида обрў қозонмоқда.
