Apr 09, 2021
Анна Самохина-ўта ёрқин аёл - минглаб мухлислар оромини ўғирлаб, бироқ ўз шахсий ҳаётида бахтини топишга улгурмаган: мудҳиш касаллик уни айни гуллаган чоғида ўлдирди.
Мафтункор, серғайрат, эҳтиросларга лиммо-лим... "Уста ва Маргарита" спектакли учун бош қаҳрамон ролига муносиб номзод!
Унга Маргаритани ўйнашни таклиф қилишганларида буни рад этмаган, лекин у Булгаков романини саҳналаштириш билан боғлиқ телбанамо, инсу жинсли воқеалардан хабардор эди. Унда қатнашган кўплаб актёрлар саратон касалига дучор бўлишиб, ҳаётни тарк этишганди.
Масалан Владимир Бортконинг телесериали тасвирга олингандан сўнг онкология туфайли Александр Абдулов (Коровьёв), Кирилл Лавров (Понтий Пилат), Андрей Толубеев(Алоузий Могаричга овоз берган) лар вафот этишган.
Москвадаги Жануби Ғарбий театрида худди шу сабабдан Воланд ролини ижро этган Виктор Авилов ҳам ҳаёт билан видолашди. Унинг партнёри Вера Сотникова (Маргарита) актёрнинг бу сирли ҳалокатидан хавфсираб, спектаклда бундан кейинги иштирокидан бош тортади.
Ўшанда мазкур ролга Самохинани таклиф этишади. Орадан беш йил ўтгач, Анна тўсатдан қорнида кучли оғриқ ҳис қилади. "Ёқмайдиган нимадир еб қўйдим, шекилли. Ошқозоним оғрияпти,"-дея ёзғиради ҳамкасбларига. Бироқ шифохонада уни текширувдан ўтказишгач, врачлар шундай дейишади:
- Сизда тўртинчи босқичдаги ошқозон саратони мавжуд, афсус, ҳеч қандай ёрдам бера олмаймиз...
Анна карахтликдан қотиб қолганди. Карьера, шон-шуҳрат, молу-дунё-буларнинг бари бир лаҳзада муҳим бўлмай қолди.Шифокорлар ҳеч қандай умид бағишлашмас, фақат кимё муолажаси тайинлашган, бу эса унинг аҳволини бадтар оғирлаштирарди.
-Ошқозон саратони шуниси билан хатарлики, узоқ вақт аломатини кўрсатмайди,-тушунтиришди шифокорлар.
Хориж клиникалари ҳам актрисани даволашни рад этишган.
Анна нега 47 ёшида бундай касалликка мубтало бўлганига тушуна олмасди. Наҳотки ўша мудҳиш спектакль бунга сабаб? Балким бу ҳаётидаги кўнгилсизликлар оқибатимикан? Ахир "Иф қалъасининг маҳбуси", " Қонундаги ўғрилар", "Шоҳона шикор", " Дон Сезар де Базан" фильмларида роль ижро этган гўзал актриса минглаб ошиқ эркаклар юракларини забт этгани билан шахсий ҳаётда бахтли эмасди. Унинг учта никоҳи ҳам ажралиш билан якун топган.
Биринчи турмуш ўртоғи Александр Самохинни Анна16 ёшида, Ярославль театр билим юртига ўқишга кирганида учратган. У ундан 8 ёш катта ва маҳаллий драма театрида актёр бўлиб ишларди.
Улар биргаликда 15 йил яшашди, қизлари Саша туғилди, кейин эса Самохина эрини ташлаб кетди. "Александр оғир-босиқ одам эди. Мен эса бир жойда пўпанак босиб, занглаб ўтиролмайман,-ҳикоя қилди Самохина.-Менга эркинлик ва олдинга интилиш зарур."
Александр эса буни бошқача тушунтирди.
"Актёрларда четда ошиқ-маъшуқлик одатий ҳол. Биз ярим йиллаб бир-биримиздан мамлакатнинг турли нуқталарида йироқда бўлардик. Анянинг ўз ишқий ўйинлари бор эди, меники ҳам. Нега биз ажрашдик! Олтин тоғ ваъда қилишса, ҳеч бир аёл индамай кетолмайди. Мени топган-тутганим етарли эмас эди. Шунинг учун у ўзига йўлдош учратди."
Самохинанинг иккинчи эри бизнесмен Дмитрий эди. "Ўртамизда учқун эмас, балким мисоли машъала ёнди. Жудаям ажойиб, дабдабали тўйимиз бўлди. Биз қойилмақом жуфтлик эдик, барча бизга лол эди."-деганди у.
Ўшанда, оғир 1990 йиллари киносанъати жар ёқасида эди. Анна янги турмуш ўртоғи кўмагида хусусий киностудия ва ресторан очди, бизнесвумен сифатида шаклланди. Лекин иккинчи никоҳи саккиз йилга чўзилди. "Дмитрий унда барчаси жудаям кўпдан кўп ва беқиёс бўлишини истаб, мени четга суриб ташлади,-деганди актриса,-мен эса иккинчи даражали ролга кўникмаганман, шунинг учун биргина сумкачамни кўтариб, ундан кетдим."
Учинчи эри божхоначи Евгений билан ҳам турмуши юришмади. "Бошида ниҳоятда кучли романтик муносабатда эдик, кейин эса у уйда жанжал чиқара бошлади. Мен эса эркак зўравонлигини кўтара олмайман. Ўзгаларнинг қаршисида у мени танқид қиларди! Уч йилдан сўнг унга" Бас, етар! " дедим ва биз ажрашдик. "
Умрининг сўнгги йилларида Анна энди у ҳеч қачон эрга тегмаслиги ҳақида сўзларди."Ҳозир озодлик ва хотиржамлик ҳолатида бўлишни истайман.Ҳеч қандай эр керакмас.Худонинг ўзи асрасин!"Самохинанинг назарида ўзи учун яшаш қулай ва башангроқ эди.Бироқ инсон муҳаббат туйғусидан юз ўгириб бахтиёр бўлиши мумкинми?" Актриса касаллигига ўз ташқи қиёфасига керагидан ортиқ андармон экани ҳам сабаб этиб кўрилади. Самохина ҳусну жамоли қадрини яхши тушунар, кексайиб қолишдан ваҳима босиб, қиёфасини асраш учун ўзини бетиним парвариш қиларди. "Ўзимни азобга дучор этганман. Мудом парҳездаман. Шундай вақтлар борки, уч тўрт кунлаб урвоқ ҳам тотмайман. Ҳатто анерексияга учраб, қоқ суякка айланишимга бир баҳя қолди." дея жавоб берганди ўз гўзаллиги сири ҳақидаги саволга. Афтидан бундай тажриба унинг ошқозон ҳолатига ижобий таъсир кўрсатмаган, Бундан ташқари Анна кўп чекар, муттасил қаҳва ичарди, аслида қовурдоқсиз яшай олмаслигини таъкидларди. Тўғри йўл тутмаётганини англарди. Маргаритани ўйнашга рози бўлганидан ҳам таассуфда эди. Ҳатто ғойибдан ҳам дараклар олаётганди.
"Кунларнинг бирида Пайғамбарни кўрдим,-дея ҳикоя қилди Самохина шифохонада.-Биринчи марта бир неча йил олдин соғлик пайтимда. Экстрасенс аёл танишим бор эди, унинг ҳузуридаги сеанслардан бирида ниҳоятда кучли тезликда қайгадир учаётганимни ҳис қилдим ва қайсидир сайёранинг атрофида айландим, шунда у ердан узун ридоли, тим қора сочли киши тикилиб турганини пайқадим. Бу ўткир қадалган нигоҳни ҳеч ҳам унутмайман. Кейин тушуниб етдимки, у Исо Масиҳ эди.
Бу менга ўз ҳаётимни ўзгартириш зарурлиги ҳақида огоҳлантириш эди, бироқ ҳаммасини эски ҳолича қолдирдим. Иккинчи бор Пайғамбар чеҳрасини шу ерда шифохонада кўрдим. Шифтга қараб ётганимда бирданига у зоҳир бўлди: Мен сўрадим: "Сен Исомисан?" У жавоб берди: "Мен сени кўплар орасидан ажратиб олдим. Сен бетобсан, бу бекорга эмас. Ўзинг ҳам биласан негалигини..." Шунда ҳис қилдимки, ҳа, биламан, нуқул ўзим ҳақимда қайғурдим. "
Анна қизининг бахтига тўғаноқ бўлганига ўзини айбдор санаб, тавба-тазарру қилаётганди. Саша актёр Филипп Азаров билан севишганида, онаси шундай деган: "Ҳеч қандай тўй бўлмайди! Ё мени ёки ўша актёрчани танлайсан." Самохина Филипп қизига моддий манфаатни кўзлаб, уйланмоқчи деган фикрда эди. Бир неча ой ўтгачгина, Анна ўз хатосини англади, бироқ кеч эди. "Агар ўшанда Саша турмуш қуришига руйхушлик берганимда, балким невараларим туғиларди,-деганди Самохина.-Ўшанда ўлиш ҳам осон бўларди, балким."
Чорасизликдан Анна ноанъанавий табобат усулида ҳам даво топишга уринди. Турли гиёҳ дамламалари ичиб, оғриқ жойга ҳўл латта босарди, ҳатто ўзини очликка маҳкум этди, бироқ тўрт кундан ортиғига бардош беролмади. Ҳеч нима ёрдам қилолмади, оғриқ эса чидаб бўлмас даражада эди, натижада Самохина Парголово қўрғонидаги шифохонада ётишга кўнди, бу ерда оғриқни қолдирадиган кучли воситалар билан азобини юмшатишди.
Ўлимидан бир неча кун аввал у тавба қилишга ўзини ҳозирлади. Диққатини жамлаб, гуноҳларидан ўтишни сўраб, Тангрига ёлворди. Юраги енгил тортди. "Энг муҳими тириклигингда севган инсонларингга меҳрли сўзларни айтиб қолишга улгуриш экан,"-дея тан олганди актриса. Шифохонага учала турмуш ўртоғи ҳам келди.
" Онам сўнгги кунларигача, соғайишга ва мухлисларни роллари билан хурсанд этишга умидланди,-деди қизи Саша,-У кишилар уни ҳар доим навқирон ва гўзал хотирлаб юришларини истарди. Ҳатто ўзи учун ҳалокатли вазиятда ҳам жилмайиб турди, ҳодисаларни жиддий қабул қилмади. Охирги саноқли бир неча кун ичида кўз ўнгимизда сўниб битди... "
Сўнгги нафасигача Анна ташқи қиёфасига оро берди. Кимё муолажаси асоратларини бекитиш учун рўмол ўради, юзидаги упа-элик пардози эса ўлаётган чоғида ҳам беқиёс эди.
У тунда вафот этди. Шифохонадаги ҳамшираларнинг айтишича, улар ўшанда тўсатдан қўнғироқлар бонгини эшитишган. Ва аниқ-тиниқ бир эркак овози ҳам қулоқларига чалинган: "Анна Самохина ўлди."
