Oct 25, 2022
Red Bull GmbH(Ред Булл) - Австрия компанияси, энергетик яхна ичимликлар ишлаб чиқарувчиси ( улардан машҳури шу номдаги газли ичимлик Red Bull). Автоспорт, мотоспорт, сноубординг, велоспорт ва бошқа спорт мусобақалари ва танловлари ташкилотчиси ва ҳомийси сифатида кенг ном қозонган.
1982 йили Таиландга хизмат сафарига борган Дитрих Матешиц ( ўшанда Blendax халқаро брендининг маркетинг департаменти бошлиғи лавозимида эди) бутун Узоқ Шарқда севиб ичиладиган " салқин ичимликлар" довруғини кузатди. Бу тузуккина иш бераётган ичимликларни Осиё ташқарисида сотиш ғояси унда Гонконгнинг "Мандарин" отели барида ўтирганида миясига келди.
Энергетик ичимликлар орасида энг машҳур Осиё бренди Kratinddaeng (тай тилидан " қизил ҳўкиз") эди. Унинг таркибига кофеин, шакар ва таурин кирарди.
Бу тақдир қўллови эдими ёки тасодиф Таиландга келиши арафасида Дитрихнинг қўлига ўнта япон йирик бизнесменларининг рўйхати тушиб қолганди, Ажабланарлиси шундаки, унинг бошини Японияга Lipovitan D энергетигини олиб кирган киши эгаллаганди.
1984 йили Дитрих Матешиц ва Чалео Йавидья RedBulGmbH компаниясини тузишди. Ҳар бири 500 минг доллардан сармоя тикишди. Компанияга Матешиц раҳбар бўлди. Уч йил давомида Европа меъёрларидаги таъмга тўғри келиши учун ичимлик формуласи ўзгартирилди.Таркибида шакар камайтирилиб, гази оширилди.1987 йили ўзини Red Bull Австрия компанияси сифатида тақдим эта бошлади. Шу йилдан кейин бир неча йил компания миллионлаб зарар келтирди. Чунки Матешицнинг бу соҳада тажрибаси йўқ эди. У рақобат билан тўқнаш келди: унинг Red Bullи Соса-Соla ва Pepsi каби наҳанглар, ҳамда Jolt Cola, Lucozade каби салқин ичимликлар рўпарасида қаттиқ туролмаётганди. Шунда тадбиркор ичимлик банкаси дизайнини ўзгартирди: у икки баробарга ихчамлашди ва шаклан батарейкага ўхшаб қолди. Ичимлик қиймати эса икки баробарга ошди, уни ичимликлар бўлимидан ташқари дўконларнинг исталган бўлимида сотадиган бўлишди. Даромад ўса бошлади.
Дитрих Матешиц ичимликни талабалар орасида ёйди, шунчаки уни ёшларнинг кечки ўтиришларига тарқатиб чиқди. Ичимлик ўз оммасини топиб, тезда шуҳрат қозонди.
1992 йили Red Bull Венгрия ва Словения дўконлари пештахтасида пайдо бўлди. Икки йил ўтгач Германия ва Британияда. 1997 йилда ичимлик АҚШга етиб борди. Ҳозирда RedBull жаҳоннинг 160 дан ортиқ давлатида сотилмоқда, ва мазкур мамлакатларда энергетик ичимликлар ишлаб чиқариш бозорининг 70 фоизини ўзида жамлаб, сўнгги йилларда чиққан муваффақият қозонаётган янги маҳсулотлар ичида пешқадами ҳисобланади.
2001 йили таркибида юқори миқдорда кофеин ва таурин бўлгани ҳамда ичимликдаги аралашма тўлиқ ўрганиб чиқилмагани важи билан уни Франция ва Данияда сотиш тақиқланди. 2008 йили эса таурин бошқа аминокистота- аргенинга алиштирилгач, Францияда унинг сотуви қайта йўлга қўйилди.
Red Bull мақбул ичимлик сифатида спорт мусобақаларига ҳам кириб боради. Натижада 2005 йили Формула 1 Jacuar пойга командаси сотиб олинади. Ҳозирда у Red Bull номи билан машҳур.
Red Bull активига шу номдаги бир неча хоккей ва футбол жамоалари ҳам киради. Компания кун сайин ўзини катта спортга урмоқда. Зотан унда бунга маблағ тўлиб тошган , ичимлик даромади ҳозирда миллиардлардан ошади, Дитрих Матешиц Австрия тарихида ( ҳозирча ягона) илк миллиардерга айланди.
Эндиликда Red Bull ичимлиги 160 та мамлакатда тақдим этилади. Жаҳоннинг №1 ичимлиги муваффақиятига масъулликни компаниянинг дунё миқёсидаги 7758 нафар ходими ўз бўйнига олган.
Red Bull компаниясининг бош идораси Австриянинг Зальцбург шаҳрига яқин Фушль- ам-Зее ҳудудида жойлашган.
Осиёдан топилган оддий ичимликдан Дитрих Матешиц дунё брендини яратди. Мазкур бренд уни миллиардерга айлантирди.Бошида унинг бу ғоясини ҳеч ким жиддий қабул қилмаган, пулларини бекорга шамолга совуряпти деган фикрда эдилар.Австриялик амалдорлар ичимлик таркиби илмий жиҳатдан тўлиқ синовдан ўтказилмагунча уни сотишга рухсат бермадилар.Айнан мазкур ичимлик таркибий жиҳатдан таъми ҳар томонлама текширувдан ўтган дунёдаги ягона ичимлик ҳисобланади.
Шу йилнинг 22 октябрида, бир неча кун олдин Дитрих Матешиц оламдан ўтди. Унинг ёши 78 эди.
Интернет маълумотлари асосида Бакир Зокиров тайёрлади.
