KFC-полковникдан ширин таом

Орамизда фаст-фудни татиб кўрмаган бирор кимса бўлмаса керак. Жаҳондаги барча фаст-фуд учта баҳайбат мамонтга суянади: Макдональдс, Бургер ва КFC. Энди сўз KFC ҳақида, рестораннинг ўзи ҳақида эмас, балким унинг асосчиси ҳақидадир. У ўз мисолида миллионер бўлиб етишиш ҳеч қачон кеч эмаслигини кўрсатди.

БОЛАЛИК

Харланд Дэвид Сандерс 1890 йилнинг 9 сентябрида туғилган. Беш ёшида отаси вафот этгач, онаси оиладаги тўртта жонни боқиш учун иккинчи иш топишига тўғри келди, Харланд эса укаси ва синглисига энагалик қилди. Олти ёшлигидан у овқат тайёрлашни биларди ва ўша вазият учун бу мантиқий ҳол эди. 13 ёшлигида ўгай отаси уни уриб, кун беравермагач, уйдан бош олиб, амакиси ёнига кетди.
1906 йили Кубада Америка босқинчилигидан сўнг, кўтарилишлар юз берди ва Америка ҳукумати кўнгиллиларни ҳарбий хизматга чақира бошлади. Сандерс қалбаки ҳужжат тайёрлаб, ёшини катта кўрсатиб, 16 ёшида кўнгиллилар сафига кирди. Ҳеч бир шикастсиз, хизматни ўтагач, Харланд Сент-Луизга келади ва дуч келган юмуш билан шуғулланади. Шу тарзда 22 ёшигача темирчига ёрдамчи, ўт ёқувчи, суғурта агенти ва шахтёр бўлиб ишлайди. Лекин ўз иши билан машғул бўлиш истаги ундан кетмаганди.

РЕСТОРАН, БИРОҚ КFC ЭМАС.

1930 йили 40 ёшида у йўл ёқасидаги ёнилғи қўйиш шохобчасини ижарага олади, уни газакхонага мослаштирали. Трассада уникидан бўлак емак ейиш билан боғлиқ бирор жой йўқ эди, шунинг учун газакхона тезда мижозларга тўлди.
1934 йили Кентукки штатида йўл ёқасидаги яна бир шохобчани ижарага олади. Бу муассаса менюси Сандерснинг алоҳида рецепти бўйича пиширилган биргина қовурилган товуқдан иборат эди. Унинг таъми ташриф буюрганларга шу қадар ёққандики, Сандерснинг ажойиб товуғи таърифи атрофга ёйилди. Емакхона қошидаги навбат бир неча километрга чўзилганди. Шу кўринишда таомнинг нақадар хуштаъм бўлганини тасаввур қилиш мумкин.
Сандерс ширин товуқлари ҳақидаги кенг тарқалган хабарлардан сўнг, штат губернаторининг шахсан ўзи унга "Кентукки полковниги" унвонини беради. Вақт ўтгач, полковник Сандерс йўлдаги мотелни сотиб олади ва уни Sanders Court деб номлайди. Лекин бу 1950 йилда рўй берди...

ФЕНИКС ТОВУҒИ КFC БЎЛИБ ҚАЙТА ТУҒИЛДИ

Бу даврда глобал модернизация кетаётган, янги йўл магистраллари ётқизилаётганди. Йўл магистрали режасига кўз югуртириб, Сандерс унинг ўзига тегишли шохобчалардан бир неча километр яқинга ўтишини кўрди. Шунча йиллар давомида қилган иши бир кунда барбод бўлди. Бу уни ўз муассаларини баҳосидан уч баробар арзонига сотишга мажбур қилди ва янги жой излашига тўғри келди.
62 ёшга кирибгина у ўз янги муассасаси учун сармоядор топишга муваффақ бўлди. У билан бирга муассасани янгича Kentucky Fried Cickken деб номлайди. Корхона Юта шаҳрида жойлашганди. Биринчи йилнинг ўзида унинг айланмаси қолган муассалардан кўра уч марта кўп эди. Сандерснинг антиқа товуғи янги шаҳарда тезда машҳур бўлди. 1960 йили полковник Сандерс миллионерга айланди, унинг KFC шохобчалари сони 200 тага етди.
Бироқ у 70 ёшни уриб қўйганди ва бундай ёшда киши доимий ва хотиржам нарсалар ҳақида ўйлаб қолади. Сандерснинг бизнесга қизиқиши сўнади ва 1964 йили KFC ресторанлар тармоғини 2 млн долларга сотади. Лекин унинг ихтиёрида маҳсулот сифатини назорат этиш вазифасини қолдиришади. Фаолиятдаги ҳар қандай ўзгариш унинг розилиги билан амалга оширилиши лозим эди. Шунингдек, у KFC янгиликлари бренди юзи бўлди.
1980 йили 90 ёшида Сандерс зотилжамдан вафот этади. Янги раҳбарият унинг қиёфасини  абадийга логотипга муҳрлайди.
Хулоса. Сандерс мисоли одам неча ёшга кирса-да кўнглига ёққан ғояни ҳаётда тадбиқ қилиш, 70 ёшда ҳам миллионер бўлиш мумкинлигини ёрқин исботлайди. Энг муҳими ўз ишини севмоқ ва кишиларга севинч улашмоқликдир.