Aug 04, 2023
Бир эркак бир аёлни севарди.
У бутун умр уни севди. Йигитлигида кўнгил қўйиб, сўнг ҳарбий хизматга жўнади. У эса эрга тегиб кетди, шунақаси ҳам бўладику, ахир. Ёшликда кутиш машаққатли. Ва одатдаги ҳаёт бошланди. Турлича вазият ва воқеалар. Бу эркак улкан муваффақиятларни қозонди. Унинг ўзига яраша қизиқишлари бор эди, бу Сергей деганлари ҳамма қатори эркак эди. Аммо у барибир уйланмади. У қалбининг тубидан уни кутмаган ўша қизни севишда давом этарди, бироқ ажабтовур томони бу ҳақда ҳеч кимга гапирмасди. Буни ўзига ўзи ҳам тан олмасди. Лекин унинг чароғон кўзларини, кулгиси, майин қўлларини, бежирим қоматини эсларди.
Орада ўттиз йил ўтди - деярли бутун умр. Сергей ижтимоий тармоқда ўралашмасди- ундек юқори мартабали одам ахир у ерда нима ҳам қилсин? Ва деярли синфдошлари, болаликдаги дўстлари билан алоқа қилмасди. Бу тасодифми ёки йўқ, ҳайтовур Олянинг сайтига кўзи тушди. Муҳаббат ва умид ҳақида панд-насиҳатлар жойлаштирилган оддийгина саҳифа эди у. Бирорта ҳам сурати йўқ, ўзи ҳақида ҳеч бир маълумот битилмаган бўм-бўш, қизиқарсиз саҳифа эди. Аммо унинг юраги ҳаприқди, бўғилиб кетишига бир баҳя қолди, шу тарзда унга хат ёзди. Аёл қисқа ва қуруққина жавоб қайтарди. Эркак яна ёзди- у ҳатто аёлнинг қаерда яшашини ҳам билмасди. Ва яна қисқа жавоб келди. Мулойим ва қисқа. Шунда у муҳаббат юрагидан ҳеч қаёққа кетмагани, унинг дийдорини бир кўриш учун боридан кечишга тайёрлигини тушунди. Унга Оляси билан гаплашса бўлди эди. Лекин аёл қатъиятли тарзда у билан учрашишни рад этарди, бироқ хатларга жавобни канда қилмасди. У яна уни излашни бошлади, манзилни топди, аммо яна гарангсиди- ахир одамнинг устига бостириб бориб бўлмайди-ку, оиласи, эри, фарзанд, неваралари атрофида юрса...
У жудаям ситам чекди. Аёл эса жавоб йўлларди.
Шу тарзда бир йил ўтди. Сергей эса азобланарди, ва туш кўрарди, тушида у ўзларини биргаликда ўша навқирон, чиройли жуфт сифатида кўрарди, яна ҳам яқин, бирга...У дардга чўмди. Шунда Оля унга ёзди. Хатда шундай дейиларди -ҳаммаси ўз ҳолича қолсин. Учрашиш керакмас. Ёшим элликни қоралаган. Мен оғир бетобман. Ногиронман. Дори ва муолажалар таъсирида 40 килога семирдим. Деярли оёқ боса олмайман, қадам ташлаганим дорихонагача. Сен мени қаердадир четда пусиб пойлашингдан ҳам хавотирланмайман, чунки мени барибир таний олмайсан. Мен энди нафаси бўғриққан қари семиз кампирман, аммо сен мени қандай бўлсам шундайлигимча хотирла. Мен ҳам сени бутун умр севдим. Никоҳим хато бўлиб чиқди, у билан унча кўп вақт бирга бўлмадик. Ҳаётим ёлғиз ўтди- борини яшадим. Тамом вассалом. Мана шунақа ғамгин ва ҳаққоний мактуб. Сергей шу зумда Олянинг ҳузурига учди-ахир манзил унга аён эди. Аёл эшикни очди ва кўзидан дардчил ёшлар дув-дув тўкди... Эркак эса унга тикилиб, чароғон нурли кўзлар ва майин қўлларни учратди. У фақат ўз Олясини кўриб, бошқа ҳеч нимани пайқамасди. Ҳа ҳеч қандай ортиқчасини. У ҳамон соҳибжамол қолган, ва оламда ундан яхшиси йўқ эди. Бутун бир йилни шунчаки хат ёзишга сарфлаб юбориш исрофгарчилик ва аҳмоқлик эди аслида. Энди эса улар бирга. Ва бир бирларида ҳеч қандай ўзгариш аломатини сезишмасди, чунки муҳаббатнинг ўз нигоҳи бор.
Севимли инсонинг билан нима содир бўлмасин у доим гўзал ва кераклидир. Балким Оля энди соғаяр- чунки бунга энди унда сабаб бор. Бу севги воқеаси. Бизни севадиганлар учун ҳеч ҳам ўзгармаслигимиз ҳақидаги ҳикоя....
А. Кирьянова
