Талабалик. Ётоқхонадаги даврим

Олий ўқув юртига ўқишга кириб бошқа шаҳарга, айниқса ўзга давлатга кўчиб ўтишнинг ўзи оғир бир ишдир. Айниқса ўзинг каби талабалар жойлашган ётоқхонада яшашга кўникиш яна ҳам оғирроқ. Музлатгичда нарсалар ўздан ўзи пайдо бўлиб қолмаслиги, кир кийим ўзини ўзи ювмаслиги, эрталаблари эса ошхона дастурхони тайёр егуликлар билан негадир сени кутмаслиги дарҳол сезилади.

1.Ҳар хил одамлар билан яшаб кетишни ўрган.

Ётоқхонада сен оддий турмушда ҳеч аҳамият бермайдиган турли ижтимоий қатлам вакиллари бор. Бироқ ётоқхонада улар билан бир хонани бўлишиб, шароитни бир бирига улашишга тўғри келади. Ўзингнинг коммуникатив салоҳиятингни ошириб, ҳамхоналар билан чин муносабатга киришиш фойдага ишлайди. Янада яхши ва мулойим бўл. Негаки битта хона нафрат учун тор, қасос учун кенгдир.

Ва зиқна ҳам бўлма! Ётоқхона- бу коммунизм тартиб қоидаларига амал қилишинг лозим оз сондаги жойлардан биридир, айнан эса: ҳар бирининг қобилиятига қараб, ҳар бирига эҳтиёжига кўра деганидир. Мабодо сенда ҳеч вақо бўлмаса, бу ҳамсоянгда албатта топилади. Демак, бирор ширин емагинг ёки рўзғорда ишлатиладиган буюм билан бўлишишдан тортиниб уялиб ўтирма.

2.Ўз нарсаларингга хазир бўл ва уларни кўз остингга ол

Ётоқхонада армияда бўлгани каби "ўғирлашди" деган сўз йўқ, "йўқотдим" деган сўз бор. Шунинг учун ётоқхона бўйлаб ноутбук, эйрподс ва бошқа қимматбаҳо буюмларингни сочиб ташлама, йўқса улар оёқ чиқариб абадийга кўздан ғойиб бўлиши мумкин.

3.Йиғиштириниб юр!

Ивирсиган ва кир-чир одамни ҳеч ким ёқтирмайди, қанчалар ижодий, боқий хаос ичида яшайдиган шахс бўлишингга қарамасдан ён-верингни тозалаб, тартибга сол. Яна ҳам маъқули хонадошлар билан келишиб, бинони тозалаш бўйича жадвал туз, шундай қилмасанг, ётоқ жойингда яна ҳам ҳамхона кўпайиши мумкин - кўп оёқли, мўйловли.

4.Шовқинга кўник

Соат 22.00 дан 07 га қадар шовқин чиқармаслик шарт бўлса-да, талабалар жон-жаҳдлари билан мазкур қоидани инкор этишга тиришишади. Шу сабабли яхшиси ўзингга мустаҳкам қулоқчин сотиб ол, ёки ғалағовур ичида ухлашга одатлан.
Яна бир йўли- диққатни бир жойга жамлаб, ҳордиқ чиқариш учун ҳамхоналар билан биргаликда тинч соатларни келишиб олиш мумкин.

5.Комендант- талабанинг энг яқин дўсти

Комендант, кирчи аёл, қўриқчи ва вахтёрлар-булар бариси билан дўстлашиш зарур, аҳёнда уларга шоколад совға қилиш керак бўлган кишилардир. Буларнинг бари эшигингнинг синишидан тортиб кечикиб келишинггача барча муаммоларни жўяли ҳал этиш учун лозим. Ҳатто сен ҳамхоналаринг билан келишолмай жиққамушт бўлганингда улар ёнингни олишиб, жанжалкашларни хонадан қувиб ҳайдашлари мумкин.
Айтмоқчи, баъзи бировларнинг айтишича, комендант билан бир масалада келишиб олса ҳам бўлади, яъни у хонангга ётоқхонада қайдда турадиган, аслида эса унда яшамайдиган талабани жойлаши мумкин.

6.Овқат пиширишни ўрган

Агарда кейин бутун умр гастрит, ошқозон яраси ва бошқа меъда-ичак касалликларига йўлиқмай десанг, доширак, чучвара ва майонезли батонларни ема. Овқат тайёрлашни ўрган! Ўшанда нафақат тўқ ва соғлом бўласан, бир талай қорни оч ўртоқлар ҳам орттирасан, улар эса ўрнингга уй вазифаларини бажариб беради.

7.Иқтисодиёт иқтисодли бўлиши керак

Одатда талабалар ўзларини шундай тутишади: стипендиянинг илк куни пулни қиммат алкоголь ва қовурдоққа сарфлаб, қолган 29 кун бошқалардан қарзга картишка тиланиб юради. Асло бундай бўлма!
Бюджетни режалаштиришни ва сарф харажатларни тақсимлашнинг ҳадисини ол, зеро ушбу кўникма сенга ётоқхонадан ташқари сўнгра бутун ҳаётингга керак бўлади.

8.Ғийбатдан қоч

Ғийбатлашиш кишиларда ўзаро муносабатлар кучайиб, уюшқоқлик шаклланишига таъсир кўрсатади, лекин бундан йироқ юрган маъқул, чунки ғийбат тезда ёйилади. Сен кимгадир ёмон ҳамхонанг ҳақида нимадир вайсаб қўйишинг мумкин, орадан бир соат ўтгач эса бутун ётоқхона сени ҳамма ҳақида ҳукм чиқарадиган аблаҳга чиқаради. Энг афзали барча билан илиқ муносабатда бўлиш лозим, чунки муҳтож қолганингда сенга қаердан кўмак келиши номаълум.

9.Биринчи кунлардан улфатчиликка йўл қўйма

Ота-онанг жиловидан қутулиб, эркинликка чиққанинг заҳоти ўзингни талтайтирма. Чунки ҳар қандай арзандалигинг, масалан, ичиб юришинг сени ётоқхонадан ҳайдаб чиқаришларига зўр сабабдир.
Яхшиси ушбу озодликдан унумли фойдалан, ҳамма нарсани ўрган, чунки ёшлик давринг ва етарлича кўп вақтинг бу мақсадни тўла тўкис оқлашга хизмат қилади.

(Инетдан)