Қулупнай

Хотини тўсатдан бетобланди, қорнида кучли оғриқ сезди. "Тез ёрдам" келди, кўриб, олиб кетди. Эр ўзини йўқотиб изидан касалхонага жўнади. У ерда ўзини қўярга жой тополмай зир айланди, хотинини жарроҳлик амалиётига олиб киришганини билди. Унга уйга кетаверишини айтишди. Кейин ўзи қўнғироқ қилади...
Уйига қайтди: ҳамма ёқ тинч. Ерда нарсалар сочилган. Пиёлада совуган чой. Муҳими у ҳадеб хотини билан шу вақт, охирги пайтга довур тортишарди.
Пул етмасди. Аёли эса уни сарфлагани сарфлаган эди. Кеча бир қути қулупнай сотиб олибти. Жимитдек қутида, фалон пулга. Бир ҳовуч сунъий етиштирилган меваларни анча пулларга! Қиш чилласида қулупнайга бало борми,инсоф юзасидан айтинг?! Миллиардер бўлишмаса.
Яна крем харид қилибти. Ана банкаси кўзгу олдида турибти. Уям жуда қиммат. У эса тўнғиллаб, сўкинди.
Газ плитасида эса бир қозон шўрва. У неча марталаб бунча миқдорда таом пиширмасликни айтган. Уларни ким ҳам ерди иккаласидан бошқа. Ҳозирги кунгача фақат иккаласи бирга яшашган, ҳа.
У компьютер қаршисига ўтирди. У ҳеч нима ҳақида ўйламасликни ҳоҳларди: бироқ шу он курорт рекламаси очилди. Хотини курортга, денгизга боришни истаганди. Бу жудаям қиммат эрмак,у худди шундай деганди. Ипотекага қарзни тўлаб, уй майдонини кенгайтириш лозим бўлган пайтда аҳмоқона исрофгарчилик бу. "Икки хоналик" ни "уч хоналик" ка алмаштириш керак. Ва яна пойдевор тагидан ўра ковламоқ зарур, машинани ҳам алмаштириш гали келган...
Нуқул шу эмас. Аёл ваннахонани узоқ вақтга эгаллаб оларди. Эр эса ранжирди. Шунга ўртада жанжал чиқарди. Энди эса ванна бўм-бўш. Каровотда ҳам истаганча ёнбошлаб ётиш мумкин. Ҳеч ким халал бермайди, кўрпани ҳам ўзига тортмайди.
Квартирада чекиш ҳам мумкин. Ҳеч ким айюҳаннос солмайди. "Эсинг жойидами? Бас қил!" дея. Пиво ичиш мумкин. Хурмачангга сиққунча. Ва футбол ёки сиёсий баҳсларни кўриш мумкин.
Диванда айиқ боласи тасвири туширилган хотинининг халати турибти. Ғижим холатда: аёл зўрға уни ечиб, қайта кийинганди.
У халатни йиғиштириб, тахлади ва уч яшар болакайдек ҳўнг-ҳўнг йиғлади. Чунки ёлғиз бир ўзига ҳеч нима керакмас. Бир ўзига ёмон. Икковлон бирга яшаган хонадонда танҳо унга чидаш қийин. Нега у жанжаллашарди. Нега майда-чуйдага тежади. Қандайдир шилимшиқ ўргимчакка ўхшаб қулупнайга ёпишиб олди. Балки бу тирик жоннинг сўнгги шодлиги бўлгандир?
У худди шундан йиғларди, халат билан ёшини артарди. Халатдан турмуш ўртоғининг ҳиди келарди.
Кейин эса қўнғироқ қилиб, ҳаммаси хайрли тугаганини билиб олди. Яхши ўтганини. Дарҳол машинаси томон жиннилардек югурди. Қулупнай сотиладиган жойга бориб, нақ беш килосини харид қилди. Кўплаб шаффоф қутиларга жойланган, унчалик ширинмас меваларни. Аммо уларда бироз бўлса ҳам қулупнай таъми бор эди. Ним таъм. Бутун палатадагиларнинг ҳаммаси қулупнай ерди, ҳаммаси мақтарди. Фақат ҳали хотинига бу мумкин эмас. У қулупнайларни тарқатиб, хотинининг каровоти чеккасида ўтирарди. Жудаям бахтиёр. Барча йўқотганларининг барисини бирданига топиб олган бахтли одам сингари.

А. Кирьянова