Пешонангдан кўр

Менинг бир дугонам бор, ёши 29 да,эрга тегмаган, ҳеч қачон бирор киши билан жиддий муносабатда бўлмаган. Бўйи пастак, тўлача, давлат ишхонасида ишлайди, маоши оз, ётоқхонада яшайди, маълумоти йўқ. У билан 8 йилдан буён дўстмиз, шу вақт давомида у нуқул ўзига эр ахтаради, бироқ ҳеч ҳам тополмайди. 

У навбатдаги марта меникига меҳмонга келаркан, яна одатдагидек бизнинг турмушимизга қараб оила қуришни, турмуш ўртоғи, фарзандлари бўлишини ҳоҳлаётганини, ҳаётида ахийри қандайдир барқарорликка эришишни исташини гапирди. Йиллар бир бирини қувиб ўтиб боряпти, у эса бундан ёшармаяпти, бахт эса ҳамон йўқ. У кўзида ёш айланиб мендан ёрдам сўраб, ким биландир таништиришимни ўтинди. 

Эрим автосервисда ишлайди, унга ишхонасида бамаъни бўйдоқлар бор ёки йўқлигида сўраб кўрдим. Эрим менга бир яхши йигит борлигини айтди-меҳнаткаш, ичмайди, сўққабош, ақли расо. Хуллас бахт овчилари сифатида ўзимизни синаб кўрмоқчи бўлдик. Йигитга ишнинг моҳиятини тушунтирдик, у кўнди. 

Дугонамни гаплашиб олиш, севинтириш, учрашувни белгилаш учун чақирдим. У хурсанд бўлганча ҳовлиқиб келиб унинг кимлигини суриштира бошлади. Унга тушунтира кетдим: тунукасоз, ақлли, унга тенгдош, уйланмаган, боласи йўқ, мияси жойида. Шу пайт дугонамнинг туси дарҳол ўзгариб, бир гапни айтганидан, тилим калимага келмай қолади: " Тунукасозга бало борми? Йўқ, менга тунукачи керакмас. Мен пўрим, қандайдир директорми, чиройли, ақлли, қўли очиқ кишини ҳоҳлайман." Гапимни йўқотдим. Тилимда фақат бир савол айланарди: "Чиройли, ақлли, бўйдоқ бадавлат директорга нега энди ёши ўтган, хурилиқо бўлмаган, маълумотсиз, камбағал сен кераксан?" Дўстлигимизни бузиб, кўнглини хуфтон қилгим келмади. Жим туришни маъқул топдим. 

Бир вақтнинг ўзида йигит учрашувни кутаётганди, дугонамнинг рад жавобини унга айтишдан уялаётгандик. "От билан юриш" га қарор қилдик, уни бошқа дугонам билан таништирмоқчи бўлдик. 30 ёшлардаги, ўртача қомат ва кўринишдаги аёл билан. 

Дугонам билан келишдим, у тунукасозга бажонидил рози бўлди, телефон рақамлари алмашилиб, учрашув белгиланди. 

Учрашувдан сўнг дугонамнинг йигитдан оғзи қулоғида эди. Иккинчи учрашувни кутарди. Йигитнинг сўзича эса, "қиз унчалик ёмонмас, лекин у менинг дидимдаги модель эмас, мен ёш, бўйчан, бадани тарсиллаган, кўкраги туртган, ҳусни жамоли кетворган ва қимматбаҳо кийинган жононларни ёқтираман." 

Аллақачон турмуш қуриши лозим бўлган учта шахс ёнидаги оддий одамларни фаҳмламай гўёки тўкис умр йўлдошларни ахтариб умрларини яшаб қўйишмоқда. Кейин эса бу одамлар бизникига меҳмонга келиб, шундай бўзлашади: "Сизларга ҳавасимиз келади, сизларда оила, фарзандлар, шинамлик бор, биз эса ёлғиз ва бахтсизмиз." 

Бунинг устига эрим ҳеч қанақа директор, мен эса ҳеч қанақа қуриб кетмагур модель эмасман. Лекин биз тўқиб чиқарилган аҳмоқона мезонларни эмас, бир биримизни севамиз. 

Хуллас, сўққабош одамлар, хом хаёлда яшаб, шаҳзода ва маликаларни кутишни бас қилинг. Ҳаёт шундай чопқиллаб ўтадики, қарилик кириб келганини сезмай ҳам қоласиз. Атрофга разм солиб қаранг, ёнингизда ҳусни тузукроқ, камтарона даромадли ажойиб кишилар бўлиши мумкин. 

Ўзингизга танқид кўзи билан боқиб, "ўзим талаб қилаётган шартларга мосманми?" деган саволни беришга уялманг. Қизларга айтадиган ақлли гапим: "Генералнинг хотини бўлишни истасанг лейтенантга турмушга чиқ." Йигитларга эса: "Юз гўзаллиги вақтлар ўтиб сўниб борар, қалб гўзаллиги эса ошар." 

Dreamoflife