Отамнинг қизи

Кунларнинг бирида дадам билан иккимиз ёлғиз қолдик . Ойим икки ҳафтага бувимникига учиб кетди. Ва ахийри озодлик шамоли кўкрагимизга тегди.
Энди идиш-товоқ ювиш шарт эмас!
Кўчадан қайтиб бошқатдан кийинишга ҳожат йўқ!
Ҳар куни эрталаб сочни қайтадан ўриш керакмас!
Кўчадаги мушук ва итларни силаш мумкин!
Диего Марадона ўйнаган футбикларни қоқ ярим кечаси соат 2 да томоша қилса бўлади!
Бошбошдоқлик бир ҳафта давом этди. Тўсатдан пуллар тугади. Маошгача ҳали уч кун бор эди. Ва дадам билан шиша идишларни топширгани бордик. Идишларни қабул қиладиган шохобча пул бермасди, топширилган шиша эвазига моллардан нимадир олиш мумкин эди. "Танлаганингни танла,"-деди дадам қўлини силкиб саховатпеша оҳангда.
Мен бу пайтда пулнинг саноғини билардим.
-Қелинг тўққизта.. Ё ўнта бўларкан- пиво ва лимонад оламиз.
-Нима ичгинг келяптими?-деди дадам қаҳқаҳ отиб.
-Йўўў! Шунчаки мабодо яна пулимиз тугаб қолса, топширишга шиша идишларимиз бўлади.
Дадам аввалига қизарди. Сўнгра ранги оқиш бўзарди.
Кейин мени уйга етаклаб олиб келди. Ўзимни ёлғиз ташлаб, икки соатдан сўнг қўлида тархун ва дюшес, вафлили шоколад ва яна аллақандай егуликлар билан тўлдирилган иккита пакетни кўтариб қайтди.
Мен ўша юз йиллик гол урилган "Аргентина-Англия" ўйинини ширинликни чапиллатиб томоша қилардим. Фақат қулоғимнинг бир четида дадамнинг сўзлари бир қур чалинарди: "Токи тирик эканман, қизалоғим, ҳеч нимага муҳтож бўлмайсан."
Ойимни аэропортда кутиб олишдан олдин дадам иккимиз уйни йиғиштирдик, ва ярим ой ичида илк бор сочимни ўрдик. Унинг ичига билмаган ҳолда кўйлак тугмасини унутиб қолдирдик.
Зиёли ойим умрида бир марта, ғалати ўрилган сочимни ечаётиб тугмани кўриб қолганида сўкинганди.
Ҳаётимиз яна одатдаги измига тушиб кетди: эрталабки нонуштага бўтқа, мукофотга лимонад, "Электроник саргузаштлари"," Уч мушкетёр".
Яна икки ҳафтадан кейин сизнинг ёшингиздан катта бўламан, дада.
Болалигимдан нигоҳим сизникидек ўткир, косметологдан бунга гап эшитаман, тасаввур қиляпсизми?
Чиннигулли чой ва чиройли ифорли хунук боғ атиргулларига муҳаббат ҳам сиздан ўтган.
Сочимни ҳам ўзим ўта бесўнақай ўраман, дадажон, бунинг менга кераги ҳам йўқ, энди улғайганман, сочларим тагидан кесилган.
Ойим орзу қилганидек ҳеч ҳам жиддий эмасман. Марадона ҳам наркоман ва қўшмачи бўлиб чиқди, ахир бу унча муҳим ҳам, эмас, дада, шундайми?
Ҳаётда бошқа нимадир муҳим, дада, бошқа нимадир. Буни билмайман ҳали, буни ҳамон ўрганяпман.
Жимгина яшаяпман, дада. Ҳеч нимага муҳтожлигим йўқ.
Яна икки ҳафта ўтиб сиздан ёшим доимга каттаради.
Ҳаммаси бунчалар ғалати бўлмаса, дада.


Диана Азизова