Навбатдаги баҳор

Кекса аёл кимсасиз истироҳат боғидаги ўриндиқда ўтирарди. Унга укки бурун ёш полициячи яқинлашди.
-Салом. Бу ерда бўлишингиз мумкин эмас-карантин.
Буви хўрсинди, аммо жойидан жилмади.
-Сизга жарима ёзишимга тўғри келади-қатъият билан деди тартиб назоратчиси.
-Ёзаверинг-жавоб берди аёл-марҳамат, тортинманг. Ахир бу сизнинг ишингиз,-жилмайди у.
Энди полициячи хўрсинди.
-Илтимос, уйингизга боринг, ахир сиз хавфли гуруҳдасиз. Ҳозир карантин. Сизга жарима ёзишни ҳоҳламайман, нафақангиз ҳам оз бўлса керак.
Буви диққат билан унга тикилди ва бироз ўйчан боқиб, кичкина сумкасини очди. Ичида бир тўплам жарималар бор эди.
-Эҳе, кўп экан-ку сизда,-деди ўзини йўқотиб полициячи,-тушунмай қолдим.
-Нимани тушуниш мумкин, бўтам. Сизда карантин, менда эса баҳор. Балким-да, умримнинг сўнгги баҳори, ёшим ҳам анчага бориб қолган. Ўлимдан ҳайиқмайман. Лекин шундай яшнаётган, куйлаётган, гуллаётган баҳорни ўтказиб юборишдан қўрқаман. Тўрт девор ичида уззукун яқинларинг билан экран орқали сўзлашишдан, бетиним сериалларни томоша қилиб, ваҳимали хабарларни тинглаб ўтиришдан не фойда? Жарималарингиз мени ҳуркитмайди. Пандемияни яшаб ўтсам тўлайман, давлатга фойда бўла қолсин, яхшиликка ишлатишар, агар ўлиб нетсам бунга ҳожат ҳам қолмас
-Тушуняпман. Ҳа... Ростдан бўлиши мумкин ҳол.-йигит гапиришга сўз тополмасди.-Тушуняпман. Бироқ қолганларга қандай намуна кўрсатяпсиз?
-Қандай намуна? Ҳар кимнинг ўлим қаршисида ўз мулоқоти бор. Мен эса у билан иккинчи жаҳон урушидан буён суҳбат қураман. Ҳамшира эдим. Билсанг, ҳар Ғалаба байрамида йиғлайман. Қанчалар кўп одам ўша баҳордан мен кўраётган ҳар баҳоргача етиб кела олмади.
Полициячи бувининг юзига қараб неча ёшдалигини чамаламоқчи бўлди, балким жудаям анча. У жимгина жаримани ёзиб, суҳбатдошига узатди. У эса қарамасдан сумкасига солди.
-Сизга ёқимли баҳор тилайман, хоним-дея сўз қотиб, йўлида кетди.
-Сенга ҳам бўталоғим, ёқимли баҳор.-ўйчан тортди буви ва серажин юзини майин апрель қуёшига тутди.
Уйда у жарима квитанцияларини очди. Унда яқинда мактабни битирган йигит қўлидан кулгили оғиз чизилганди. Нега ёшлар ўртасида бунақа аҳмоқона башараларга урф? У квитанцияларга бирма бир қараб чиқди. Уларнинг ҳар бирида жарима суммаси ўрнида ёки смайлча ёки соғлик тилаги битилган, биттасида эса қўриқчи бобосининг телефон рақами ҳам акс этганди. Кекса аёл уч кун иккиланди- телефон қилсами ёки йўқ?
Қандайдир ноқулай.
Бошқа тарафдан эса айни баҳорда севги ҳақида ўйламаслик ҳам мушкул.

Рут Дорум
-